काठमाडौं– प्रधानन्यायाधीशमा अस्वीकृत भएपछि लामाे समय घर बिदामा बसेर सर्वाेच्चमा हाजिर भएका न्यायाधीश दीपकराज जाेशीका लागि पेशी नताेकिए पछि कामविहीन भएका छन् । सोमबार प्रधानन्यायाधीशका रुपमा ओमप्रकाश मिश्रले शपथ लिएलगत्तै मंगलबार प्रधानन्यायाधीशका हैसियतमा पेशी ताेकेका थिए ।

प्रधानन्यायाधीश मिश्रले अदालतमा उपस्थित सबै न्यायाधीशकाे नाममा पेशी ताेके । तर , न्यायाधीश दीपकराज जोशीको नाम मुद्धा हेर्ने कजलिष्टमा राखेनन् । साेमबार प्रधानन्यायाधीशमा अाेमप्रकाश मिश्र नियुक्ति भएपछि जाेशी स्वागत गर्न सर्वाेच्च अाएका थिए । जोशी सोमबारसम्म बिदामा थिए । मंगलबार बिहानै उनी सर्वोच्च अदालत पुगे । तर उनलाई कुनै मुद्दा हेर्न दिइएन । मुद्धा हेर्न नदिएपछि जाेशी कार्यकक्षमा बसिरहेका छन्।

नवनियुक्त प्रधानन्यायाधीश मिश्रले मंगलवार १० वटा इजलाशका लागि पेश तोकेका छन् । जसमा न्यायाधीश प्रकाशमानसिंह राउतको एकल बाहेक अन्य संयुक्त इजलाश छन् । गत साउन १८ गते (शुक्रवार)को संसदीय सुनुवाइ समितिको बैठकले प्रधानन्यायाधीशमा अस्वीकृत गर्ने निर्णय गरेपछि जोशी विदामा बसेका थिए ।