काठमाडौं–१३ वर्षीय स्कूले बालकको हत्याको विरोधमा तनाबग्रस्त स्थिति सृजना भएपछि स्थानीय प्रशासनले कञ्चनपुरको भीमदत्तनगरपालिका–७ हल्दुखालमा घोषणा गरेको निषेधित क्षेत्र हटेको छ।

महाकाली जनसेवा माध्यमिक विद्यालयमा कक्षा–८ मा अध्ययरत १३ वर्षीय तिलक चन्दको हत्याको विरोधमा स्थानीयले आरोपितको घरमा आगजनीको प्रयास भएपछि शुक्रबार दिउँसो १२ बजेबाट घोषणा गरिएको निषेधित क्षेत्र ९ घन्टापछि हटेको हो।

कञ्चनपुरका प्रमुख जिल्ला अधिकारी मनोहर खनालले स्थिति सामान्य भएपछि बेलुका ८ बजेबाट निषेधित क्षेत्र हटाइएको भएपनि सुरक्षा व्यवस्था कडा पारिएको बताए। ‘सम्भावित घटना हुन नदिन प्रहरी परिचालन गरेका छौं,’ प्रजिअ खनालले काठमाडौंपाटीसँग भने।

मृतक बालकका आफन्तले आरोपितको गोठ आगजनी गर्नुका साथै घरमा समेत आगजनीको प्रयास गरेपछि शुक्रबार दिउँसो प्रहरी र स्थानीयबीच झडप भएको थियो। घरमा समेत आगजनीको प्रयास हुन थालेपछि प्रहरीले स्थितिलाई नियन्त्रणमा लिन नौ राउण्ड अश्रुग्याससमेत प्रहार गरेको थियो।
त्यस लगत्तै जिल्ला प्रशासन कार्यालय कञ्चनपुरमा दुबै पक्षबीच वार्ता भएको छ।

वार्ताले ठोस निर्णय दिन नसकेपनि प्रशासन केही लचिलो बनेपछि मृतकका आफन्तले आन्दोलनका कार्यक्रमलाई केही मत्थर पारेपनि उनीहरुले आन्दोलन भने फिर्ता लिएका छैनन्।

प्रजिअ खनालका अनुसार मृतकका आफन्तले घटनामा संलग्नमाथि कडा कारबाहीको माग गरेका छन्।  यसैगरी, बालक तिलक अध्ययनरत महाकाली जनसेवा माध्यमिक विद्यालयको नाम उनको नामबाट नामाकरण हुनुपर्ने, हल्दुखालमा प्रहरी चौकीको स्थापना हुनुपर्ने, घटनाका आरोपी भइ फरार रहेकालाई पक्राउ गर्नुपर्ने माग गरेको प्रजिअ खनालले जनाए।

चारदिनदेखि हराइरहेका बालक चन्दको हत्या भएको अवस्थामा बुधबार शब भेटिएपछि परिवार र आफन्त आक्रोशित बनेका हुन्।

स्कुलको खाजा खाने समयमा हराएका बालक चार दिन पछि स्कुलदेखि २ सय मिटरको दूरीमा रहेको खोलामा घोप्टो परेको अवस्थामा मृत भेटिएका थिए प्रहरीले हत्या गर्ने उनकै सहकर्मी आशिष अधिकारीलाई पक्राउ गरिसकेको छ। उनीसहित प्रकाश थापा र रमेश खड्कासमेत पक्राउ परेका छन्।