काठमाण्डु – भारतको हिमाञ्चल प्रदेशबाट लोकसभा सांसदमा निर्वाचित बलिउड अभिनेत्री कंगना रनौतमाथि चण्डीगढ विमानस्थलमा थप्पड प्रहार भएको छ ।

केन्द्रीय औद्योगिक सुरक्षा बल (सीआईएसएफ) का महिला जवानले उनलाई बिहीबार विमानस्थलमै थप्पड हानेकी छन् । घटनाबारे सांसद कंगनाले प्रहरीमा निवेदन दिएकी छन् ।

किसान आन्दोलनका बेला कंगनाले महिलाबारे दिएको विवादित वक्तव्यप्रति असन्तुष्टि जनाउँदै सीआईएसएफकी महिला जवान कुलविन्दर कौरले थप्पड हानेकी भारतीय सञ्चारमाध्यमले जनाएका छन् ।

अभिनेत्री कंगना हालै भएको लोकसभा निर्वाचनमा ५ लाख ३७ हजार २२ भोटसहित विजयी भएकी छन् । उनका प्रतिस्पर्धी विक्रमादित्य सिंहले ४ लाख ६२ हजार २६७ मत ल्याएका छन् ।