काठमाण्डु – एभरेष्ट प्रिमियर लिग (ईपीएल) मा विराटनगर वारियर्सले काठमाण्डु किंग्स इलेभेनलाई ७ रनले पराजित गरेको छ । आइतबार आफ्नो अन्तिम खेलमा विराटनगरले काठमाण्डुमलाई अनिल कुमार शाह र रायनखान पठानको उत्कृष्ट प्रदर्शनमा पराजित गरेको हो ।

जितको लागि १ सय ५ रनको विजयी लक्ष्य पछ्याएको काठमाण्डुले निर्धारित ८ ओभरमा ३ विकेट गुमाउँदै ९७ रन बनायो । काठमाण्डुका विकेटकिपर रहमानउल्लाह गुरबाज १५ बलमा ३ चौका र १ छक्का सहित सर्वाधिक २८ रनमा आउट भए ।

राजु रिजाल १५ बलमा २ चौका र १ छक्का सहित २४ रनमा अविजित रहे । सुबास खकुरेल १० बलमा ३ छक्का सहित २६ रनमा अविजित रहेपनि जितको लागि पर्याप्त हुन सकेन । काठमाण्डुलाई अन्तिम ओभरमा जितको लागि ६ बलमा २६ रन चाहिँएको थियो । सुबास खकुरेलले रायनखान पठानलाई पहिलो बलमा छक्का, दोस्रो बलमा दुई र तेस्रो बलमा छक्का प्रहार गरेपछि खेल रोचक बनेको थियो ।

बाँकी ३ बलमा १२ रन चाहिँएको थियो । चौथो बलमा दुई र पाँचौं बलमा एक रन बनाएपछि जितको आशा सकिएको थियो । अन्तिम बलमा पठानले एक रन दिँदै विराटनगरको जित पक्का गराए ।