काठमाण्डु – नेकपा एमाले तथा प्रधानमन्त्री केपी शर्मा ओलीले पार्टीमाथिका सबै षड्यन्त्र र आक्रमणविरुद्ध पार्टीपंक्ति एकढिक्का भएर लड्ने बताएका छन् ।

केन्द्रीय कमिटीको आठौं बैठकको समापनलाई सम्बोधन गर्दै प्रधानमन्त्री ओलीले भने, ‘हाम्रो महान् कार्यको रिस–डाह गर्नेहरू अनेक लान्छना लगाएर एमालेलाई कमजोर बनाउन लागिरहेका छन् । आपराधिक कुरा गरेर, जनतालाई भ्रममा पारेर एमालेलाई आक्रमण गर्ने काम भएको छ । यी सबै षड्यन्त्र र आक्रमणविरुद्ध सबै पार्टीपंक्ति एक ढिक्का भएर हामी लड्नेछौँ ।’

उनले एमालेविरुद्ध घेराबन्दी भइरहेको दाबी गर्दै त्यसलाई पराजित गरेर अघि बढ्ने बताए । ओलीले एमालेविरुद्ध परिकल्पित समाचार बनाएर प्रहार गरिएको दाबी गर्दै आफूहरू दृढताका साथ दह्रो भएर सत्यका पक्षमा उभिने बताए । उनले भने, ‘हामीमाथि आन्तरिक र बाह्य चौतर्फी हमला छ तर हामी निरन्तर अगाडि बढी नै रहनेछौं ।’