काठमाण्डु– उर्जा जलस्रोत तथा सिँचाइमन्त्री दीपक खड्काले नेपाल विद्युत् प्राधिकरणले हुँदै नभएको नाफा देखाएको आरोप लगाएका छन् ।आजको संसद बैठकमा मन्त्री खड्काले प्राधिकरणले प्रिमियममा मूल्यमा जनतालाई शेयर जारी गर्न नभएको नाफा देखाएको आरोप आरोप लाएका हुन् ।

उनले ट्रंक र डेडिकेटेड लाइनको उठ्न बाँकी भनिएको महसुललाई समेत नाफामा बाँधेर नाफा देखाइएको र यसैका आधारमा प्रिमियममा मूल्यमा जनतालाई शेयर जारी गर्न यो देखाइएको बताए ।

उनले प्राधिकरणका कार्यकारी निर्देशक कुलमान घिसिङले समयभित्र कार्यसम्पादन मूल्याङ्कनका लागि समयभित्र अनुरोध नै नगरेको र मन्त्रालयले पत्राचार गरेपछि आफूले आफैँलाई नम्बर दिएर पठाएको बताए ।

उनले घिसिङलाई कानुनभन्दा माथि हो भने संसद् भनिदिन आग्रह गरेका छन् । प्राधिकरण सञ्चालक समितिले प्राधिकरणको सम्पत्ति तथा दायित्वको मूल्याङ्कन (डीडीए) गर्न निर्णय गरे पनि कुलमानले नटेरेको र प्राधिकरण अन्तर्गत कुलमानले नेतृत्व गरिरहेको २५ वटाभन्दा बढी संस्थाको विवरण समेत प्राप्त गर्न नसकिएको उनको भनाइ छ ।

लोडसेडिङ अन्त्य गरेकोले समाजले घिसिङलाई नायकको उपाधि दिइरहेको पनि मन्त्री खड्काले बताए।

‘लोडसेडिङ अन्त्य कसरी भएको थियो पूर्वऊर्जामन्त्रीहरूलाई राम्रो ज्ञान छ,’ मन्त्री खड्काले भने, ‘लोडसेडिङको अन्त्य हुँदैगर्दा हामीहरूले भारतबाट ४५० मेगावाट विद्युत आयात गरेका थियौं। तत्कालीन अवस्थामा नेपालको आवश्यकता ४२५ मेगावाटको थियो। हाम्रो आवश्यकता पूरा गरिदिएकोमा बरू भारतलाई धन्यवाद दिऔं।’ ‘लोडसेडिङ अन्त्य उहाँ (कुलमान घिसिङ) एक्लैले गरेको होइन,’ उनले भने, ‘उहाँले राम्रा गरेका काममा धन्यवाद दिन सकिन्छ।’

लोडसेडिङ अन्त्यको श्रेय भारतलाई जानुपर्ने पनि मन्त्री खड्काले बताए।