काठमाण्डु- मधेश प्रदेशका मुख्यमन्त्री सतिशकुमार सिंहले अस्पतालहरूको छड्के अनुगमन गरेका छन् ।

शनिबार मुख्यमन्त्री सिंहले सिरहाको मिर्चेयामा १४ निजी अस्पताल र पोलिक्लिनिकको अनुगमन गरेका छन् । अनुमति नलिई सञ्चालित १३ स्वास्थ्य संस्थालाई बन्द गर्न निर्देशन दिएपछि सञ्चालक, चिकित्सक र कर्मचारीहरू बिरामी छाडेर भागेका छन् ।

अनुगमन टोली मिर्चेया बजार पुगेको खबर फैलिएसँगै ८ स्वास्थ्य संस्थालाई बन्द गर्न मुख्यमन्त्री सिंहले तत्काल निर्देशन दिए ।

बन्द गर्न निर्देशन दिइएका स्वास्थ्य संस्थाहरूमा समित माउन्ट हस्पिटल प्रालि, एस जेके पोलिक्लिनिक, मंगलम हेल्थ केयर सेन्टर, सिद्धकामना हस्पिटल प्रालि, शान्ति हेल्थ केयर प्रालि, बाल संसार हेल्थ केयर प्रालि, राम ओरल एण्ड डेन्टल क्लिनिक, रेखा नर्सिङ होम, मिथिला चश्माघर आँखा उपचार केन्द्र, बालकल्याण हेल्थ केयर प्रालि, विष्णु पोलिक्लिनिक, लक्ष्मी हेल्थ केयर प्रालि र लाइफलाइन क्लिनिक छन् ।

मिर्चेया नगरपालिकाबाट १५ शैयाको अनुमति लिएको मनकामना मिड इस्टर्न अस्पतालले मापदण्डविपरीत २५ शैयाभन्दा बढीको सेवा सञ्चालन गरेको पाइएको छ ।

यस्तै, एनेस्थेसिया चिकित्सक र भेन्टिलेटरबिना मेजर शल्यक्रिया गरेको भेटिएपछि १५ दिनभित्र मापदण्डअनुसार सेवा सञ्चालन गर्न उक्त अस्पतालाई निर्देशन दिइएको छ ।

सिद्धकामना हस्पिटल प्रालिमा अनुगमन टोली पुग्दा सञ्चालक, चिकित्सक र कर्मचारीले ८ बिरामी र कुरुवालाई छाडेर भागेका छन् ।

त्यहाँ भेटिएका दुई स्वास्थ्यकर्मी भनिएकालाई प्रहरीले नियन्त्रणमा लिएको थियो तर अस्पताल बन्द गर्ने निर्देशन पछि उनीहरूलाई छाडिएको छ ।

मुख्यमन्त्री सिंहले हालसम्म १५७ निजी स्वास्थ्य संस्थाको अनुगमन गरेका छन् । तीमध्ये १७ वटा मापदण्डअनुसार सञ्चालित छन् भने १०८ वटा बन्द गरिएका छन् । नवीकरण नगरेका २५ अस्पताललाई नवीकरण गर्न भनिएको छ ।

बन्द गरिएकामध्ये मापदण्ड पूरा गरेका पाँच अस्पताललाई प्रदेश मन्त्रालयको टोलीले अनुगमन गरी सञ्चालन अनुमति दिएको छ ।