काठमाण्डु – गायक विकास मानन्धरको पहिलो ‘मन’ गीतको भिडियो सार्वजनिक भएको छ ।

गीतमा गायक विकासकै शब्द र संगीत छ । गीत कोविद बज्रको बज्र क्रिएसन रेकर्डसमा रेकर्ड गरिएको हो ।

विकासकै यूट्युब च्यानल विकास मानन्धरबाट सार्वजनिक गीतको भिडियोमा विकाससँगै सुवास सुनुवार, महेश मानन्धर र मनिष महर्जनको अभिनय छ ।

भिडियोमा सरोजकुमार चौहानको निर्देशन, छायांकन र सम्पादन, रेनिस फागोको कलर ग्रेडिङ, राकेश दाहालको पब्लिसिटी डिजाइन र शिखा मानन्धरको डिजिटल ग्राफिक डिजाइन छ ।

गायक विकासले गीतले मानव हृदयको चञ्चल र परिवर्तनशील स्वभावलाई आत्मीय रूपमा चित्रण गरेको बताए । ‘गीतमा खुशी, दुःख, उत्साह र निराशाजस्ता भावना बीचको यात्रा र ती सबै भावनाहरूलाई सन्तुलनमा ल्याउने प्रक्रियालाई देखाइएको छ,’ उनले भने, ‘भिडियोमार्फत हामीले आफ्नो दैनिक जीवनको थकानबाट आजित एक व्यक्तिको कथा देखाएका छौं, जसले आफ्ना साथीहरूसँग पुनः मिलन गरेर आनन्द र ताजगी अनुभव गर्छ । गीतले मित्रताको सुन्दरता र त्यसबाट आउने नवीन उर्जालाई प्रस्तुत गरेको छ ।’

नेपालको मकवानपुरस्थित हेटौंडा घर भएका विकास हाल अष्ट्रेलियाको मेलबर्नमा बस्दै आएका छन् । उनको गीत यूट्युब र स्पोटिफाई, एप्पल म्युजिक, अमेजन, यूट्युब म्युजिकजस्ता संगीत प्लेटफर्महरूमा उपलब्ध छ ।

विकासका अनुसार गीतको अवधारणा १ दिनमै तयार भएको थियो भने म्युजिक भिडियो २ दिनभित्र खिचिएको थियो । विकासले गीत यूट्युबको अतिरिक्त स्पोटिफाई, एप्पल म्युजिक, इन्स्टाग्राम, फेसबूक, टिकटक, डिजर, टाइडल, प्यानडोरा, स्न्याप च्याट, र रोब्लक्सजस्ता प्लेटफर्महरूमा उपलब्ध रहेको बताए ।