काठमाण्डु-स्थानीय तहको आसन्न उपनिर्वाचन लगायतका विषयमा छलफल गर्न माओवादी केन्द्रको पदाधिकारी बैठक आइतवार बस्दैछ ।

बैठक दिउँसो ३ बजे केन्द्रीय कार्यालय पेरिसडाँडामा बस्ने छ । बैठकमा उपनिर्वाचनको तयारी, पछिल्लो राजनीति घटनाक्रमलगायतका विषयमा छलफल हुने सचिव दिनानाथ शर्माले बताए ।

माओवादी केन्द्रले केन्द्रीय समितिको बैठक उपनिर्वाचन पछि बस्ने भन्दै तत्कालका लागि पदाधिकारी बैठक बोलाएको हो । उपनिर्वाचनमा माओवादी केन्द्रले सत्तारुढ दल बाहेकसँग चुनावमा तालमेल गर्न सक्ने बताएको छ ।

सचिव शर्माका अनुसार बैठकमा आगामी उपनिर्वाचनमा विपक्षमा रहेका दलहरूबीच तालमेल गर्ने वा नगर्ने विषयमा पनि छलफल हुनेछ ।