काठमाण्डु – राष्ट्रिय फुटबल टोलीका सदस्य मिक्छेन तामाङले ‘ए’ डिभिजन क्लब थ्रीस्टारसँग दुई बर्षको सम्झौता नवीकरण गरेका छन् । बुधबार क्लबले दुई बर्षको लागि मिक्छेन तामाङसँग सम्झौता नवीरकण गरेको हो । सम्झौता रकम भने खुलाइएको छैन ।

‘हामीले मिक्छेनसँग अहिलेलाई दुई बर्षको लागि सम्झौता नवीकरण गरेका छौं । त्यसपछि पनि सम्झौता बढाउन सकिने छ,’ ललितपुरे क्लबका एक प्रतिनिधिले भने ।

मिक्छेन १३ औं दक्षिण एसियाली खेलकुद (साग) मा नेपालले स्वर्ण पदक जित्दा टोलीका मुख्य खेलाडी थिए ।

गत सिजनसमेत थ्रीस्टारमै रहेका मिक्छेनले यसपालि पनि क्लबसँग रहने निर्णय लिएका हुन् । मिक्छेनलाई अध्यक्ष अरुनमान जोशीले १४ नम्बर अंकित जर्सी दिएर क्लबमा स्वागत गरे ।

यसअघि क्लबले राष्ट्रिय टोलीका अर्का सदस्य आयुश घलानसँग तीन बर्षको सम्झौता गरेको थियो ।

यस सिजनको लिगलाई थ्रीस्टारले कप्तान विक्रम लामासहित राष्ट्रिय टोलीका डिफेण्डर अनन्त तामाङ, निशान खड्का, अट्याकर संजोक राई, डोना थापा, निराजन महर्जनलाई अनुबन्धन गरेको छ ।

विदेशी खेलाडीमा भने क्लबले हालसम्म एकमात्र राफेल बिदियस रिमलाई जोडेको छ । गत सिजनका गोलरक्षक प्रिसोलाईसमेत क्लबले जोड्ने योजना बनाएको छ ।

क्लबले मुख्य प्रशिक्षकमा उर्जन श्रेष्ठलाई जिम्मेवारी दिएको छ । गत सिजन टोली हेरेका ए लाइसेन्स प्राप्त प्रशिक्षक मेघराज केसीले टोली छाडेसँगै उर्जनलाई मौका दिइएको हो ।

अखिल नेपाल फुटबल संघ (एन्फा)ले यस पटक लिग २९ कात्तिकबाट आयोजना गर्दैछ । पुरस्कार राशीसमेत बढाएको एन्फाले गत बर्षको ५० लाखलाई बढाउँदै यस पटकको विजेताले ७५ लाख पाउने जनाएको छ । यस्तै दोस्रो हुने टोलीले ५० लाख पाउनेछ ।

१४ क्लब सहभागी लिगको पुछारमा रहने टोली बी डिभिजनमा घटुवा हुनेछ । गत सिजन सरस्वती युथ क्लब बी डिभिजनमा घटुवा हुँदा बी डिभिजन लिगबाट सातदोबाटो युथ क्लब ए डिभिजन लिगमा बढुवा भएको थियो ।