काठमाण्डु – बिग्रिएर खेर गएका मोबाइल सेटलाई पुनः प्रयोगमा ल्याउने व्यवसाय चीनमा फस्टाउँदै गएको छ ।

चीनमा हरेक वर्ष ६०–७० करोड मोबाइल फोनहरू फ्याँकिन्छन् । तीमध्ये धेरैजसो पुनः प्रयोग गरिँदै आएको छ ।

कुनै स्मार्ट फोनलाई रिसाइकल गर्नका लागि र पुनः बिक्री गर्नका लागि एजेन्सीहरूले गहन अध्ययन गर्ने गरेका स्थानीय सञ्चारमाध्यमले जनाएका छन् । पुनः प्रयोग गर्न नसक्नेहरूलाई भएका डाटाहरू पूर्ण रूपमा मेटाइन्छ र पार्टपुर्जाहरू निकाल्ने गरिन्छ ।

‘खारेज गरिएका सबै मोबाइल फोनमा रहेका सबै इलेक्ट्रोनिक चिप्सलाई पगाल्नेछौं र उपलब्ध स्रोतहरूमा परिणत गर्नेछौं,’ चाइना रिसोर्सेस रिसाइक्लिङ्ग ग्रूप अन्तर्गत टेक्नोलोजी इनोभेसन एण्ड डिजिटल इन्टेलिजेन्स डिपार्टमेन्टका महाप्रबन्धक के यानचुनले भने ।

भविष्यमा देशव्यापी रूपमा मोबाइल फोन सुरक्षित रिसाइक्लिङ्ग डिस्पोजल मोडेल तयार गर्ने र पुनः प्रयोग प्लेटफर्म स्थापना गर्ने पनि उनले बताए ।

चाइना एसोसिएसन अफ सर्कुलर इकोनोमीका अधिकारीहरूका अनुसार यस वर्ष पुनः प्रयोगका लागि तयार गरिएका घरेलु उपकरणहरूको संख्या २० करोड नाघ्ने अपेक्षा गरिएको छ । (सीसीटीभीप्लस)