काठमाण्डु – युवा तथा खेलकुदसँगको आफ्नो अटुट सम्बन्धलाई निरन्तरता दिँदै एनसेलले ‘महिला टी–ट्वान्टी आई त्रिकोणात्मक सिरिज’का लागि सहकार्य गरेको छ ।
नेपाल क्रिकेट संघ (क्यान) सँगको सहकार्यअन्तर्गत खेलले नेपाली क्रिकेट प्रेमीलाई ऊर्जा प्रदान गर्दै क्रिकेटमा महिला प्रतिभाको विकासमा योगदान पुर्याउने विश्वास लिइएको छ ।
सहकार्य एनसेलको ‘हामी तपाईंकै लागि’ थिम र नेपालमा क्रिकेट तथा खेलकुदको विकासलाई सहयोग गर्ने प्रतिबद्धतामा आधारित छ । क्रिकेट नेपालमा सबैभन्दा बढी लोकप्रिय खेलकुदमध्ये एक हो ।
सिरिज अन्तर्गतको खेल बिहीबारबाट त्रिभुवन विश्वविद्यालय अन्तर्राष्ट्रिय क्रिकेट मैदान कीर्तिपुरमा सुरु भएको छ । नेपाली महिला क्रिकेट टोलीलाई सिरिजमा समर्थन गर्न आह्वान गर्दै क्यानले सम्पूर्ण खेलहरूको प्रवेश निःशुल्क बनाएको छ ।
सिरिजमा सहभागी टीमहरूले एकअर्कासँग ३ पटक प्रतिस्पर्धा गर्नेछन् । बिहीबारको पहिलो खेलमा आयोजक टीम नेपालले नेदरल्यान्ड्सविरुद्ध प्रतिस्पर्धा गरेको छ । अन्य खेलहरूमा नेपालले माघ १९ गते थाइल्याण्डविरुद्ध, माघ २० गते नेदरल्यान्ड्सविरुद्ध, माघ २२ गते थाइल्याण्डविरुद्ध, माघ २३ गते नेदरल्यान्ड्सविरुद्ध र माघ २५ गते फेरि थाइल्याण्डविरुद्ध खेल्नेछ ।
नेपाली टीम यो सिरिजमा इन्दु बर्माको कप्तानीमा खेल्दैछ । कप्तान इन्दुसँगै टीममा पूर्व कप्तान रुबिना क्षेत्री, सीता राना मगर, पूजा महतो, अलिशा कुमारी यादव, बिन्दु रावल, सम्झना खड्का, कविता कुँवर, ममता चौधरी, कविता जोशी, रेवती धामी, रोमा थापा, राजमती ऐरी, मनिषा उपाध्याय र ईश्वरी विष्ट समावेश छन् ।
‘नेपाल र आमउपभोक्तालाई सधैं जोडिराख्ने एनसेलको दर्शन क्रिकेट गतिविधिप्रतिको भावना र जोशसँग मेल खान्छ । यसले एनसेलको खेलसँगको सम्बन्धलाई प्रतिबिम्बित गर्दछ र यो खेलकुद र नेपालसँगको अटुट सम्बन्धको उदाहरण हो,’ एनसेलले भनेको छ । सहकार्य वृद्धि विकास, नवप्रवर्तन र उत्कृष्टताप्रतिको आपसी समर्पणको ज्वलन्त उदाहरण भएको एनसेलले जनाएको छ । कम्पनीले खेलकुदको विकास, युवा सशक्तीकरण र सामाजिक एकताको प्रवद्र्धनमा योगदान दिँदै नयाँ उचाइ हासिल गर्ने लक्ष्य रहेको जनाएको छ ।
एनसेलले स्थापनाकालदेखि नै एक जिम्मेवार कर्पोरेट नागरिकको रूपमा नेपालमा खेलकुद र प्रतिभा विकासमा महत्वपूर्ण योगदान गर्दै आएको छ । उदाहरणका लागि एनसेल यस वर्षको नेपाल प्रिमियर लिगमा पावर्ड बाई पार्टनरको रूपमा आवद्ध भएको थियो । कम्पनीले क्रिकेट, फूटबल, भलिबल, गल्फ तथा नेपालका पारा–खेलाडीहरूलाई विभिन्न राष्ट्रिय तथा अन्तर्राष्ट्रिय प्रतियोगिताहरूमा सहभागिता जनाउन सहयोग प्रदान गर्दै आएको छ ।
एनसेलले पाँचौं टाइगर कप, त्रिकोणत्मक टी ट्वान्टी आई सिरिज २०२४, आईसीसी लिग २, र नेपाल–क्यानडा १ दिवसीय सिरिजलाई पनि सहयोग गरेको थियो । एनसेलले बिर्तामोड गोल्ड कप र झापाको गोल्ड कप लगायतका विभिन्न फूटबल प्रतियोगितालाई पनि सहयोग प्रदान गरेको थियो ।
एनसेलले आफ्नो व्यावसायिक सामाजिक जिम्मेवारी (सीएसआर) अन्तर्गत, राष्ट्रिय प्यारालिम्पिक समिति (एनपीसी) नेपालसँग सहकार्य गर्दै राष्ट्रिय पारा खेलाडीलाई सहयोग र समर्थन गर्दै आएको छ । गत भदौमा पारा–ताइक्वान्डो खेलाडी पालेशा गोवद्र्धनले पेरिस प्यारालिम्पिक्स २०२४ मा ऐतिहासिक जीत हासिल गरेपछि एनसेल फाउन्डेसनले उनलाई १० लाख रुपैयाँ रुपैयाँ पुरस्कारबाट सम्मान गरेको थियो । अन्य प्यारालिम्पिक टोलीका सदस्यहरूलाई पनि एनसेल फाउन्डेसनले नगद पुरस्कारसहित सम्मान गरेको थियो ।
प्रतिक्रिया