काठमाण्डु– बंगलादेशबाट झण्डै ३ अर्ब बराबरका मालसामान आयात भएको छ । चालु आर्थिक वर्षको ८ महिनामा २ अर्ब ९६ करोड ९१ लाख ५२ हजार बराबरका मालसामान आयात भएको हो ।

यस्तै सोहि अवधीमा २७ करोड ६८ लाख ५४ हजार बराबरको सामग्री निर्यात भएको काकँडभिट्टास्थित नेपाल पारवहन तथा गोदाम व्यवस्था कम्पनी लिमिटेडले जनाएको छ ।

कम्पनीका अनुसार बंगलादेशबाट सबैभन्दा धेरै १ अर्ब ६० करोड बराबरको अप्रशोधित जुट आयात भएको छ। यसैगरी आयात भएका अन्य वस्तुमा ब्याट्री, पोल्ट्री फिड सप्लिमेन्ट, कस्मेटिक आइटम, हाइड्रोजन प्याराअक्साइड, जुट यार्न, विद्युतीय उपकरण, औषधि, आलु, पेपर, ग्लास, फुड एण्ड वेभरेजका मालसामान छन्।

काँकडभिट्टाबाट २३ करोड ६२ लाख ५८ हजारको खुदो निर्यात भएको छ। समीक्षा अवधिमा जडीबुटी, घरायसी सामग्री तथा पशुआहार पनि बंगलादेश निर्यात भएको छ। द्विदेशीय व्यापारमा सन्तुलन कायम हुन नसकेकामा चिन्ता व्यक्त गर्दै प्रमुख पाण्डेयले बिजुली निर्यातबाट त्यो परिपूर्ति गर्न सकिने बताए।