काठमाण्डु-आईसीसी विश्वकप क्रिकेट लिग–२ मा नेपालले आज अमेरिकासँग खेल्दैछ । यो खेल डालासमा राति सवा नौ बजे सुरु हुनेछ ।

खेलको लागि नेपाल क्रिकेट सङ्घ (क्यान)ले शनिवार रोहितकुमार पौडेलको कप्तानीमा १५ सदस्सीय टोलीको घोषणा गरेको छ ।

टोलीमा अनिल साह, कुशल भुर्तेल, आसिफ सेख, भीम सार्की, दीपेन्द्रसिंह ऐरी, अर्जुन साउद, आरिफ सेख, कुशल मल्ल, सोमपाल कामी, सन्दीप लामिछाने, करण केसी, ललितनारायण राजवंशी, गुल्सन झा र रिजन ढकाल छन् । देव खनाल र सागर ढकाललाई रिजर्भमा राखिएको छ । नेपाल, अमेरिका र स्कटल्याण्ड सम्मिलित शृङ्खला शुक्रवारदेखि सुरु भएको हो ।

एकदिवसीय यो खेलमा नेपालसहित ३ टोली सहभागी हुनेछन् । प्रतियोगिता अन्तर्गत नेपालले बिहीबार स्कटल्यान्डसँग खेल्ने छ भने नोभेम्बर २ मा अमेरिका र नेपालबीच खेल हुनेछ । जबकी नोभेम्बर ४ मा नेपालले फेरि स्कटल्यान्डसँग प्रतिस्पर्धा गर्नेछ ।

पहिलो खेलमा स्कटल्याण्डले अमेरिकालाई १० विकेटले हराएको थियो । अघिल्लो महिना क्यानडामा भएको त्रिदेशीय शृङ्खला सकेर नेपाल अमेरिका पुगेको हो । क्यानडामा भएको खेलमा नेपालले एउटा खेल पनि जित्न सकेको थिएन ।

तेस्रो पटक लिग–२ खेल्न लागेको नेपालको प्रदर्शन निकै कमजोर छ । लिग २ को अङ्क तालिकामा नेपाल सातौँ स्थानमा रहेको छ । ८ खेल खेलेको नेपालले हालसम्म १ एक खेलमा मात्रै जित हात पारेको छ भने ६ खेलमा पराजित भएको छ । जबकी एक खेल अनिर्णित बनेको थियो ।