काठमाण्डु-नेपालले सुपर ओभरमा अमेरिकालाई पराजित गर्दै तीन टी–२० शृङ्खलाको उपाधि जितेको छ ।

अमेरिकाको डालासमामा भएको खेलमा अमेरिकाविरुद्धको टी–२० शृङ्खलाअन्तर्गत दोस्रो खेलमा दुवै टोली बराबरीमा रोकिएपछि खेल सुपर ओभरमा गएको थियो ।

सुपरओभरमा नेपालले ३ रनको लक्ष्य पाएको थियो । यो जितसँगै नेपालले एक खेलअगावै अमेरिकाविरुद्धको टी–२० शृङ्खलाको उपाधि जितेको छ ।

सुपर ओभरमा ३ रनको लक्ष्य पाएको नेपालले २ बल अगावै लक्ष्य पूरा गर्‍यो । सोमपाल कामीले शानदार प्रदर्शन गरेसँगै अमेरिका २ रनमै रोकियो ।

सोमपालले तेस्रो र चौथो बलमा लगातार विकेट लिएर नेपाललाई जिताएका हुन् । त्यसअघि नेपालले टस जितेर ब्याटिङ् रोज्दै अमेरिकालाई १७१ रनको लक्ष्य दिएको थियो ।

नेपालका कुशल भुर्तेलले नटआउट ९२ रन बनाए । भुर्तेलले ५४ बल खेल्दै ६ छक्का र ७ चौका प्रहार गरे । अमेरिकाका जसदीप सिंह र नोस्थुश केन्जिगेले समान २ विकेट लिए ।

अमेरिकाले २० ओभरमा ८ विकेटमको क्षतिमा १७० रन बनाएपछि खेल सुपर ओभरमा पुगेको हो ।

अमेरिकासँगको पहिलो खेलमा नेपाल १७ रनले विजयी भएको थियो । टी–२० शृङ्खलाको तेस्रो तथा अन्तिम खेल सोमवार हुनेछ ।