काठमाडौं – राष्ट्रिय आईसीटी दिवस २०१९ को अवसरमा खल्ती र एनआईसी एसिया बैंकले संयुक्त रुपमा ग्राहकहरूको लागि एक विशेष बोनस अफरको घोषणा गरेका छन्। उक्त अफरमा एनआईसी एसिया बैंकद्वारा जारी क्रेडिट तथा डेबिट कार्डहरू प्रयोग गरेर खल्ती वालेटमा फण्ड लोड गर्दा प्रयोगकर्ताले १० प्रतिशत अतिरिक्त बोनस प्राप्त गर्नेछन्।

यो योजना बिहीबार एक दिनको लागि मात्र लागू हुनेछ। बैंकद्वारा जारी गरिएका कार्डहरूमार्फत आफ्नो खल्ती खाता लोड गर्दा प्रयोगकर्ताहरूले तुरुन्तै बोनस रकम पाउनेछन्। प्रयोगकर्ताले यसरी प्राप्त गर्ने बोनस रकम अधिकतम १ हजार रुपैयाँ (करसहित) मात्र हुनेछ ।

प्रत्येक खल्ती प्रयोगकर्ताले यो योजनामा दिनभरमा एकपटक मात्र सहभागी हुन सक्नेछन्। यसरी प्राप्त गरिएको बोनस खल्ती डिजिटल वालेटमा उपलब्ध कुनै पनि प्रकारको डिजिटल भुक्तानी सेवामा प्रयोग गर्न सकिनेछ।

यसका अतिरिक्त, एनआईसी एसिया बैंकले ग्राहकहरुका लागि मोबाइल बैंकिङ सेवामा अनलाइन दर्ता सुविधा समेत खुला गरेको छ। ग्राहकहरु जसले मोबाइल बैंकिङ्ग सेवा लिएका छैनन्, उनीहरुले अनलाइनबाटै मोबाइल बैंकिङ्गको लागि साइनअप गरी युजरनेम र पासवर्ड प्राप्त गर्न सक्नेछन्। राष्ट्रिय आईसीटी दिवस प्रत्येक वर्ष नेपालमा मे २ का दिन मनाउँदै आइएको छ।