काठमाण्डु – नेपाली क्रिकेट टोलीका पूर्वकप्तान पारस खड्का आबुधाबीको इमर्जिङ ट्यालेन्ट मेन्टरका रुपमा नियुक्त भएका छन् ।

अघिल्लो सिजन आबुधाबीबाटै टी–१० लिग खेलेका पारसले यस वर्ष भने कोचिङ टिमको जिम्मेवारी पाएका हुन् । यस वर्ष उनले युवा खेलाडीलाई मेन्टरको रुपमा प्रशिक्षण दिने भएका छन् । टिम आबुधाबीमा क्रिस मोरिस, रोहन मुस्तफा, ल्युक राइट, अविष्का फर्नान्डोलगायतका खेलाडी रहेका छन् ।

टिम आबुधाबीले सामाजिक सञ्जालमार्फत पारस खड्कालाई मेन्टरमा नियुक्त गरिएको जानकारी दिँदै एसोसियटतर्फ दशककै उत्कृष्ट खेलाडीको मनोनयन सूचीमा परेकोमा पनि बधाई दिएको छ ।