काठमाडौं – नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ ले मुलुकलाई समृद्धि बनाउने अभियानको नेतृत्व आफूलाई नै प्राप्त हुने बताएका छन् ।अध्यक्ष प्रचण्डले जनताको अपेक्षा अनुसार आगामी १० वर्ष मुलुकलाई नेतृत्व गर्ने अवसर नेपाली जनताले आफूलाई नै दिने विश्वास पनि व्यक्त गरे ।

देशभक्त गणतान्त्रिक मञ्चले आईतबार काठमाडौंमा आयोजना गरेको एक कार्यक्रममा बोल्दै उनले अझै १० वर्ष सक्रिय राजनीति गरेर मुलुकलाई समृद्ध बनाउने योजना पनि सुनाए । आफूले जनयुद्धको नेतृत्व गरेको, संविधान निर्माणको नेतृत्व गरेको उल्लेख गर्दै प्रचण्डले समृद्धिको महाअभियानलाई सफल बनाउन आगामी १० वर्ष नेतृत्व गर्न चाहेको पनि स्पष्ट पारे ।

अध्यक्ष प्रचण्डले मुलुक समृद्धिको महाअभियानमा अघि बढेको उल्लेख गर्दै त्यसमा साथ दिन पनि सबैलाई आह्वान गरे । कार्यक्रममा उनले बाबा बस्नेतद्धारा लिखित खण्डकाव्य ‘सेतो फरिया’ पनि विमोचन गरेका थिए ।