-सिवी अधिकारी/रासस
काठमाडौं- प्रधानमन्त्री केपी शर्मा ओलीले पन्ध्रौँ आवधिक योजना अवधिमा नेपाल अल्पविकसितको सूचीबाट हटेर विकसित मुलुकमा स्तरोन्नतिका लागि आधार तयार हुने बताएका छन्। राष्ट्रिय विकास परिषद्को २ दिने बैठकको आज यहाँ समापन गर्दै प्रधानमन्त्री ओलीले राजनीतिक स्थिरतासँगै सरकार तीव्र आर्थिक विकासको प्रक्रियामा अघि बढेको दाबी गरे।

परिषद्का अध्यक्षसमेत रहेका प्रधानमन्त्री ओलीले भने, ‘पन्ध्रौँ योजनाले देशको अवस्था परिवर्तन र पहिचानलाई बदल्नुपर्छ, त्यसका लागि शिक्षा, स्वास्थ्य, गरिबी निवारण, सुशासन, पूर्वाधार विकास, मानव सूचकाङ्क आदि विषयमा ठोस प्रगति हासिल गरेर अल्पविकसितबाट विकासित मुलुकमा परिणत गर्ने आयोजनाको अघिल्लो अवधिमै हुनुपर्छ।’

उनले आधारपत्रमा सरोकारवालाबाट आएका सुझावलाई समेटेर योजना आयोगले अन्तिम रुप दिने र त्यसलाई मन्त्रिपरिषद्बाट पारित गरिने बताए। राष्ट्रिय योजना आयोगले तयार गरेको पन्ध्राैँ योजना आगामी आर्थिक वर्षबाट कार्यान्वयनमा ल्याइनेछ। योजनाको आधारमा दीर्घकालीन सोचसहितका २५ वर्षे रणनीति बनाइने छ।

योजनाले भौतिक पूर्वाधार, सामाजिक सुधार, सुशासन, ऊर्जा, कृषि, पर्यटन आदि विषयलाई प्राथमिकता दिएको छ।

प्रधानमन्त्री ओलीले पन्ध्रौँ पञ्चवर्षीय योजनाका रुपमा भन्दा पनि रुपान्तरित अवस्थाको ‘प्रथम सङ्घीय योजना’का रुपमा व्याख्या गरिनुपर्ने बताए। पन्ध्राैँ योजना अवधिमा समग्र राष्ट्रिय उत्पादन कम्तीमा ५० प्रतिशत वृद्धि हुनुपर्नेमा जाेड दिएकन प्रधानमन्त्री ओलीले सोही जगमा अर्को पञ्चवर्षीय योजना अघि बढ्ने र त्यसले मुलुकको आर्थिक उन्नतिलाई गति दिने विश्वास व्यक्त गरे।

‘विकासलाई सन्तुलित ढङ्गले अघि बढाइनुपर्छ। अहिलेको संयन्त्र अलि खर्चालु छ, त्यसैले आर्थिक मितव्ययिता बढाउनुपर्छ, खाइरहेका सेवा लिइरहेकोभन्दा पनि खान नपाउने र सेवाबाट वञ्चितलाई पहिला ध्यान दिनुपर्नेछ। कम लगानी कम खर्चमा बढी उत्पादन र आम्दानी हुनेगरी हाम्रा प्रयास अघि बढाउनुपर्ने जरुरी छ’, प्रधानमन्त्रीले भने।

उनले परनिर्भरताले देशको अर्थतन्त्रलाई कमजोर तुल्याएको बताउँदै ऊर्जा उत्पादन बढाएर आयात प्रतिस्थापनको बाटोमा जानुको विकल्प नभएको उल्लेख गरे। प्रधानमन्त्री ओलीले वातावरण संरक्षणका लागि नवीकरणीय ऊर्जा र हरित ग्यासको खपतमा जानुपर्नेमा जाेड दिँदै विकासको सन्दर्भमा पर्यावरणको चासोप्रति सजक हुनुपर्ने धारणा राखे।

शान्ति प्रवर्द्धन र वातावरण संरक्षणको विषयमा नेपालले विश्वलाई नेतृत्वदायी सन्देश दिनसक्ने प्रधानमन्त्रीको भनाइ थियो। प्रधानमन्त्री ओलीले सङ्घीय प्रणालीले प्रधानमन्त्रीलाई शक्तिशाली बनाएको भएपनि आफूमा शक्तिको कुनै सोख नभएको उल्लेख गरे।

‘कतिपयले प्रधानमन्त्रीले पावर केन्द्रित गरे भन्नुहुन्छ, अहिलेको सङ्घीय प्रणालीमा प्रधानमन्त्रीलाई जनताले ‘पावरफुल’ बनाएका छन्, तर प्रधानमन्त्रीलाई पावरको कुनै सोख छैन, केवल देशको विकास, जनताको परिवर्तनको सोख छ, अनि त्यसका निम्ति ‘भिजन’ र सोच पनि छ’, उनकाे भनाइ थियाे।