काठमाण्डु- प्रधानमन्त्री केपी शर्मा ओली मंगलबार थाइल्यान्डको चार दिने औपचारिक भ्रमण गर्दैछन् ।

प्रधानमन्त्री ओली समकक्षी फेथोङथान सिनावात (पैटोङ्टार्न शिनावात्रा)को मैत्रीपूर्ण निमन्त्रणामा औपचारिक भ्रमण गर्न लागेका हुन् ।

नेपाल र थाइल्याण्डबीच सन् १९५९ मा कूटनीतिक सम्बन्ध स्थापना भएयता प्रधानमन्त्रीस्तरबाट थाइल्याण्डको पहिलो औपचारिक भ्रमण हुन लागेको हो ।

गत हप्ता थाई परराष्ट्र मन्त्रालयले प्रधानमन्त्री ओलीको औपचारिक भ्रमण हुने जानकारी दिएको थियो ।

मन्त्रालयले विज्ञप्ती जारी गरी थाइल्याण्डकी प्रधानमन्त्री सिनावात्राले प्रधानमन्त्री ओली र नेपाली प्रतिनिधिमण्डललाई सरकारी निवासमा औपचारिक स्वागत गर्नुका साथै विभिन्न सम्झौता र समझदारीपत्रमा हस्ताक्षर गर्ने कार्यक्रम रहेको उल्लेख छ ।

थाइल्याण्डले ४ र ५ अप्रिल अर्थात् २२ र २३मा राजधानी बैंककमा बिमस्टेकको छैटौं शिखर सम्मेलन आयोजना गर्दैछ । दक्षिण तथा दक्षिणपूर्वी एशियाली मुलुकबीच सहयोग आदानप्रदान गर्ने र व्यापार प्रवद्र्धन गर्ने उद्देश्यले बिमस्टेक स्थापना भएको हो । यस सम्मेलनमा प्रधानमन्त्री सहभागि हुनेछन् ।

सन् १९९७ मा स्थापित बिमस्टेक दक्षिण र दक्षिणपूर्वी एसियाबीच क्षेत्रीय सहयोगलाई प्रवद्र्धन गर्ने एक महत्वपूर्ण संस्था हो । यसमा नेपालसहित बंगलादेश, भुटान, भारत, म्यानमार, श्रीलंका र थाइल्याण्ड गरी सात सदस्य राष्ट्रहरू छन् ।

प्रधानमन्त्री ओलीले बिस्टेक शिखर सम्मेलनलाई २२ चैतमा सम्बोधन गर्ने कार्यक्रम छ । साथै सदस्य राष्ट्रका राष्ट्र प्रमुख तथा सरकार प्रमुखहरूसँग पनि साइडलाइन वार्ता गर्नेछन् ।

८ सम्झौताको तयारी

प्रधानमन्त्री ओलीको थाइल्याण्ड भ्रमणको क्रममा दुई देशबीच ८ वटा समझदारी तथा सम्झौतापत्रमा हस्ताक्षर हुने भएको छ । भ्रमणका अवसरमा पर्यटन र संस्कृतिका सन्दर्भमा दुुई समझदारीपत्रमा हस्ताक्षर हुनेछ । दुई प्रधानमन्त्रीको उपस्थितिमा गैरसरकारी क्षेत्रबीच ६ समझदारी पत्रमा हस्ताक्षर हुनेछ ।

काठमाडौं विश्वविद्यालय र थाइल्यान्डको एक विश्वविद्यालयबीच पनि सम्झौता हुनेछ । नेपाल नेत्रज्योती संघ र थाइल्यान्डको संस्थाबीच पनि सम्झौतामा हस्ताक्षर गर्ने तयारी छ ।

परराष्ट्र मन्त्रालयका अनुसार नेपाल र थाइल्यान्डबीच संस्कृति आदानप्रदानसम्बन्धी सम्झौतामा हस्ताक्षर हुनेछ । पर्यटन क्षेत्रमा सहकार्यसम्बन्धी समझदारीपत्रमा पनि हस्ताक्षर गर्ने तयारी छ ।

प्रधानमन्त्रीले थाइल्याण्डका प्रतिष्ठित व्यावासायीहरुसँग छलफल गर्ने र एशियन इन्स्टिच्युट अफ टेक्नोलोजीमा सम्बोधन गर्ने कार्यक्रम छ ।

प्रधानमन्त्री ओली थाइल्याण्ड भ्रमणपूर्व शनिबार पूर्वप्रधानमन्त्री, पूर्वपरराष्ट्र मन्त्री सहित विज्ञहरूसँग छलफल गरेका थिए ।

छलफलमा उनीहरूले नेपालको आर्थिक विकास, कनेक्टिभिटी, ऊर्जा, पर्यटन र सांस्कृतिक आदानप्रदान लगायतका क्षेत्रमा भ्रमणलाई देशको अधिकतम् हितमा उपयोग गर्न सुझाव दिएका थिए ।

छलफलमा प्रधानमन्त्री ओलीले यतिबेला दक्षिण एसियाली क्षेत्रीय सहयोग संगठन (सार्क) र असंलग्न राष्ट्रहरूको अभियानलाई पनि सक्रिय बनाउनुपर्नेमा जोड दिँदै बिमस्टेक सम्मेलनमा राष्ट्रिय हितलाई कसरी महत्त्व दिन सकिन्छ भन्नेबारे प्राप्त सुझावलाई मनन् गरिने बताए ।

यसैबीच प्रधानमन्त्री ओलीले थाइल्याण्ड भ्रमण र बिमस्टेक शिखर सम्मेलनमा आफ्नो सहभागिताबारे संसद्लाई जानकारी गराएका छन् ।

प्रतिनिधिसभाको सोमबार बसेको बैठकमा प्रधानमन्त्री ओलीले कुटनीतिक सम्बन्ध स्थापना भएको ६५ वर्षपछि नेपालको प्रधानमन्त्रीको पहिलो पटक थाइल्याण्डको औपचारिक भ्रमण हुन लागेको जानकारी गराए ।

प्रधानमन्त्री ओलीले नेपालीको निकट छिमेकी बाहेकका देशहरूको भ्रमणमा ‘गेट–वे’को रुपमा रहेको बैंककमा अहिलेसम्म औपचारिक भ्रमण नभएको सन्दर्भमा यो भ्रमण आफैंमा महत्त्वपूर्ण हुने बताए ।