काठमाडौं –काठमाडौंको मुलपानी स्थित एक ‘भीआईपी जुवा अखडमा शुक्रबार राति प्रहरीले छापा हान्दा भाग्ने क्रममा दुई जनाको मृत्यु भएको छ । महानगरीय प्रहरी परिसर काठमाडौंबाट डिएसपी होविन्द्र बोगटीको कमाण्डमा सादा पोशाकमा खटिएको प्रहरी टोलीले जुवा खालमा छापा हान्दै गरेको अवस्थामा ४ तलाबाट हाम्फालेर दुई जना जुवाडेको मृत्यु भएको छ ।

मृत्यु हुनेमा सरोज घले र सोमलाल तामाङ छन् । उनिहरु दुवै जनाको ललितपुरको ग्वार्को स्थित बि एण्ड बि अस्पतालमा मृत्यु भएको हो ।

महानगरीय प्रहरी परिसर काठमाडौंका प्रमुख (एसएसपी) बसन्त लामाले प्रहरी अप्रेशनका क्रममा हामफालेका दुईजनाको उपचारको क्रममा अस्पतालमा मृत्यु भएको बताए । उनकाअनुसार जुवा खालबाट एक महिला सहित २३ जना पक्राउ परेका छन् । एसएसपी लामाले घटनाकाअनुसन्धान भइरहेको जनाए ।

मुलपानी स्थित तामाङ थरका व्यक्तिको घरमा प्रहरीले शुक्रवार राती छापा हानेको थियो । उनिहरुले बाहिर च्यानल गेटमा ताला लगाएर जुवा खेलिरहेको बताइन्छ । प्रहरीले ताला फुटाएर जुवाखाल नियन्त्रणमा लिएको थियो । प्रहरीले जुवा खालबाट ४ लाख ५८ हजार नगद र केही थान कौडा बरामद गरेको छ ।

लामो समयदेखी यसरी जुवा अखडा चल्दै आए पनि महानगरीय प्रहरी वृत बौद्धका प्रमुख (डिएसपी) श्याम राईले उक्त अखडालाई संरक्षण गरेको आरोप लाग्दै आएको थियो । राइले नै उनिहरुलाई संरक्षण गरेको उजुरी स्थानीयले दिएका थिए । स्थानीयको उजुरीको आधारमा एसएपी लामाले डिएसपी वोगटीको नेतृत्वमा सादा पोशाकमा प्रहरी परिचालन गरेको थियो ।