काठमाडौ‌ –  धुलिखेल–काठमाडौं चल्ने बसमा केही दिनअघिसम्म यात्रुले भाडादर थाहा पाउन कठिन थियो। यही मौका छोप्दै बस व्यवसायीले यात्रुपच्छिे मनलाग्दी बस भाडासमेत असुल्दै आएका थिए। तर, बुधबार सरकारले सिन्डिकेट तोड्दै मयूरसहित अन्य बसलाई बनेपा पठाउन थालेपछि काभ्रे बस समितिले बिहीबारदेखि सबै बसमा भाडादर टाँस्न थालेको छ।

‘हामीले प्रत्येक बसमा भाडादर सूची टाँस्न अनिवार्य गरेका थियौं। तर, सहचालकहरूले मनलाग्दी भाडा लिँदा समस्या आएको हो,’ एक व्यवसायीले भने। चैत १ गते बनेपा आउँदा मयूर यातायातले कोटेश्वर–काठमाडौंको ३५ रुपैयाँ भाडादर कायम गरेको थियो। तर, तीन सातासम्म भाडादरमा पुनर्विचार नगरेका व्यवसायीले बिहीबारबाट एक्कासि भाडा घटाएको सूचना बसमा टाँसेपछि यात्रु अचम्ममा परेका खबर आजको नागरिक दैनिकले छापेको छ।

‘हिजो साझा बस पनि आयो । अरू बस पनि आए, त्यही भएर होला बिहीबारदेखि यताका बसवालाले बनेपा–काठमाडौंको भाडा ३५ रुपैयाँ गरेका रहेछन्’, एक यात्रुले भने। यतिखेर काभ्रे बस व्यवसायी संघले बनेपा–काठमाडौं ४० रुपैयाँ, बनेपा–कोटेश्वर ३५ र बनेपा–सूर्य्विनायक २० रुपैयाँ भाडादर कायम गरेको छ। मयूरको सरह भाडा लिन थाले पनि काभ्रेका समितिका बसले महिला, जेष्ठ नागरिक, अपांगलाई अझै प्राथमिकता दिएका छैनन्।

बुधबार मयूरको रुट परमिट खारेजीका लागि दबाब भन्दै बनेपामा सेवा बन्द गरेका काभ्रे बस र काभ्रे मिनिबस समितिले बिहीबार भने बिहानैदेखि चुपचाप बस सञ्चालन गर्न थालेका थिए। बनेपासम्म सञ्चालन हुँदै आएको मयूरले बिहीबार धुलिखेलसम्म पनि सेवा दियो भने अपराह्न पनौतीमा जाने क्रममा बनेपाको रातो पुलमा काभ्रे मिनिबस समितिका ३ वटा मिनिबसले अवरोध गरेका थिए।

‘मयूरको बाटो छेकेको खबर आएलगत्तै टोली पठाएर बाटो क्लियर गरी पनौती पठाएका छौं। बाटो छेक्ने ३ वटै मिनिबस र चालकलाई नियन्त्रणमा लिएर कार्यालयमा ल्याएका छौं,’ जिल्ला यातायात व्यवस्थापन समितिका सदस्य एवं काभ्रे प्रहरी प्रमुख सहकुल थापाले भने।

पहिलोपटक मयूरका ३ वटा बस पनौतीको मानेश्वरी बसपार्कमा पुगे पनि त्यहाँबाट व्यवसायी र मजदुरले ती बसमा यात्रुलाई चढ्न दिएनन्। मयूरलाई तोडफोड गर्ने प्रयासलाई प्रहरीले विफल पारेको छ। तर, बनेपा र धुलिखेलबाट सञ्चालन भएका मयूर बसलाई अघिल्ला दिनमा जसरी अवरोध भएको छैन।

अरनिको राजमार्गमा चालिसौं वर्षदेखि कायम सिन्डिकेट हटाउँदै अरू बसलाई समेत अवसर दिएको यातायात व्यवस्था विभागको निर्णयलाई यात्रुले स्वागत गरेका छन्। ‘सिन्डिकेट त तोडियो। अब पार्किङ, टाइम सेड्युल, ग्रामीण तहमा सेवा विस्तार, व्यवसायीको लगानी सुरक्षा, नियमसम्मत ढंगले आउने व्यवसायीसँगको समन्वयजस्ता व्यवस्थापकीय पक्षबारे पनि सोच्न सुरु गर्ने समय आयो,’ बनेपाका दीपेन्द्र पौडेलले भने।

बाँकी रुटको पनि चर्चा
यातायात व्यवस्था विभागले खोपासी–काठमाडौं रुट कायम गरी भाडादरसमेत निर्धारण गरेको अवस्थामा सो रुटमा काभ्रे मिनिबस समितिले अन्य सेवा प्रदायकलाई छिर्न दिएको छैन। रुट ओगटेर सेवा सञ्चालन नगरेकोमा यात्रुमात्रै नभई स्थानीय जनप्रतिनिधिसमेत रुष्ट भएका छन्।

‘रुट ओगट्ने तर सेवा नदिने प्रवृत्ति काभ्रे मिनिबसको रहेको छ। विगतमा खोपासीबाट काठमाडौंसम्म केही बसहरू सोझै चलाइदेउ भन्दा समितिले सुनुवाइ गरेन। अब हामी पनि कम्पनीहरूलाई यहाँबाट सेवा सुरु गर्न आह्वान गर्छौं,’ पनौती–१०, खोपासीका वडासदस्य जितबहादुर श्रेष्ठले भने।