–रमेश लम्साल

काठमाडौँ – बजार पूँजीकरणका आधारमा यस साता पनि नेपाल टेलिकम नै अग्रस्थानमा रहेको छ । नेपाल स्टक एक्सचेञ्जले सार्वजनिक गरेको यस साताको कूल १० उत्कृष्ट कम्पनीको सूचीमा टेलिकम नै कायम छ । सो कम्पनीको बजार पूँजीकरण मूल्य एक खर्ब १७ अर्ब ४५ करोड पुगेको छ ।

गत साताको तुलनामा टेलिकमको बजार मूल्यमा करीब तीन अर्बले वृद्धि भएको हो । गत साता टेलिकमको बजार पूँजीकरण मूल्य एक खर्ब १४ अर्ब ३० करोड थियो । सरकारी स्वामित्वको नेपाल टेलिकम बजार पूँजीकरणका आधारमा अग्रस्थानमा रहन पुगेको स्टकले जनाएको छ ।

यस्तै दोस्रो नम्बरमा रहेको नवील बैंकको बजार पूँजीकरण ७४ अर्ब ८३ करोड छ । गत साता सो बैंकको ७५ अर्ब ८८ करोड बराबरको बजार पूँजीकरण मूल्य रहेको थियो । यस साता करीब एक अर्ब बराबरको मूल्यमा कमी आएको हो ।

तेस्रोमा यस साता पनि नेपाल इन्भेस्टमेन्ट बैंक रहेको छ । सो बैंकको ६८ अर्ब ९१ लाख ९० हजार बजार पूँजीकरण मूल्य पुग्दा गत साताको तुलनामा केही वृद्धि भएको हो । गत साता सो बैंकको ६८ अर्ब बराबरको बजार पूँजीकरण मूल्य रहेको थियो ।

चौथोमा स्ट्यान्डर्ड चार्टड बैंक रहेको छ । त्यसको ५६ अर्ब ८० लाख बराबरको बजार पूँजीकरण हुन पुगेको छ । गत साता ५५ अर्ब २७ करोड रहेको थियो । पाँचौँमा पुनःएभरेष्ट बैंक नै रहन सफल भएको छ । सो बैंकको ५० अर्ब ६४ करोड ९५ लाख पुगेको छ । गत साता ५० अर्ब ६४ करोड ९५ लाख बराबरको बजार पूँजीकरण रहेको छ ।

यस्तै हिमालयन बैंकको रु ४२ अर्ब ८४ करोड हुन पुगेको छ । गत साता रु ४३ अर्ब ८१ करोड रहेको थियो । नेपाल लाइफ इन्स्योरेन्सको पनि बजार पूँजीकरण घटेको छ । गत साता रु ४१ अर्ब रहेकामा यस साता ४० अर्ब ८९ करोड बराबर हुन पुगेको छ ।

यस्तै नेपाल एसबीआइ बैंकको पनि बजार पूँजीकरणमा गिरावट आएको छ । गत साता ३९ अर्ब ५९ करोड रहेकामा यस साता ३९ अर्ब दुई करोडमा सीमित भएको छ । एनआइसी एशिया बैंकको भने सामान्यरुपमा वृद्धि भएको छ । गत साता ३४ अर्ब १३ करोड रहेकामा यस साता सामान्य वृद्धि भई ३४ अर्ब ६१ करोड माथि पुगेको छ ।

त्यस्तै एनएमबी बैंकको पनि सामान्य वृद्धि भएको छ । गत साता ३० अर्ब ६० करोड बराबरको बजार पूँजीकरण रहेकामा यस साता ३१ अर्ब १२ करोडमाथि पुगेको छ । स्टकले यही असोज १२ गतेदेखि असोज १८ गतेसम्मको शेयर मूल्यका आधारमा उत्कृष्ट दश कम्पनी छनोट गरेको हो ।

यस्तै यस साता माछापुच्छ्रे« बैंकको ६७६ कित्ता, मेघा बैंकको २२७ कित्ता, सिभिल बैंकको २०६ कित्ता, सानिमा माई हाइड्रो पावरको २०२ कित्ता, प्रभु बैंकको १८९ कित्ता, नेपाल क्रेडिट एण्ड कमर्स बैंक १८९ कित्ता, जनता बैंकको १७२ कित्ता, एनएमबी बैंकको १७० कित्ता, एनआइसी एशिया बैंकको १६० कित्ता र नेपाल बैंक लिमिटेडको १५९ कित्ता शेयर कारोवार भएको छ ।

स्टकका अनुसार यस साता ती कम्पनीका शेयर सूचीकृत भएका छन् । त्यसमा पञ्चकन्या माईको एक करोड १० लाख कित्ता साधारण शेयर, कालिका पावर कम्पनीको ६० लाख कित्ता साधारण शेयर र मिर्मिरे लघुवित्त वित्तीय संस्थाको ४५ लाख कित्ता हकप्रद शेयर सूचीकृत भएका छन् ।