काठमाण्डु – निर्वाचन आयोगमा राजेन्द्र महतो अध्यक्ष रहने गरी नयाँ पार्टी दर्ताका लागि निवेदन परेको छ। महतोको अध्यक्षतामा राष्ट्रिय मुक्ति पार्टी नेपाल दर्ताका लागि निर्वाचन आयोगमा निवेदन परेको हो ।

सो पार्टीका नेता केशव झाका अनुसार राष्ट्रिय मुक्ति पार्टी नेपाल नामको नयाँ पार्टीमा अध्यक्ष महतो र १७३ जना केन्द्रीय सदस्य रहनेछन् ।

पार्टीले चुनाव चिह्न माछा प्रस्ताव गरेको झाले जानकारी दिए । गत फागुनमा महतोले लोसपा परित्याग गर्दै अभियान सञ्चालन गरेका थिए।

महतो यसअघि सद्भावना पार्टी (आनन्दीदेवी), राष्ट्रिय जनता पार्टी, जनता समाजवादी पार्टी, लोकतान्त्रिक समाजवादी पार्टीमा रहेर राजनीति गर्दै पटक–पटक मन्त्रीसमेत भएका थिए।