काठमाण्डु – नेपाल राष्ट्र बैंकको गभर्नर नियुक्तिमा सत्तारुढ दल नेकपा एमालेका अध्यक्ष तथा प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवा एकमत भएका छन् ।

उच्च स्रोतका अनुसार नयाँ गभर्नर बन्ने चर्चामा पूर्वमुख्यसचिव राजेन्द्र किशोर क्षेत्री, सञ्चालक समिति सदस्य रवीन्द्र पाण्डे, ज्ञानेन्द्र ढुंगाना, गुणाकर भट्ट, निलम ढंगाना र प्रकाश श्रेष्ठको नाम रहेको छ ।

सोमबार बिहानसम्म पूर्वमुख्यसचिव क्षेत्री र पाण्डेको नाममाथि छलफल भइरहे पनि अब पाण्डेलाई गभर्नर बनाउन सत्तारुढ प्रमुख दलका शीर्ष नेता सहमत भएका स्रोतको दाबी छ ।

क्षेत्रीलाई गभर्नर बनाउन स्वार्थ समूहहरू लागेको कुरा बाहिरिएपछि ओली र देउवा पाण्डेमा सहमत भएका छन् । नयाँ गभर्नरको दौडमा पाण्डे र क्षेत्रीबीच तीव्र प्रतिस्पर्धा छ ।

सोमबार बस्ने मन्त्रिपरिषद् बैठकले नयाँ गभर्नरको टुंगो लगाउने भनिए पनि अब गभर्नरको नियुक्ति प्रधानमन्त्री ओली थाइल्याण्ड भ्रमणबाट फर्केपछि हुने उच्च स्रोतले जनाएको छ ।

गभर्नर चयन गर्न उपप्रधानमन्त्री तथा अर्थमन्त्री विष्णु पौडेलको संयोजकत्वमा पूर्वगभर्नर विजयनाथ भट्टराई र अर्थविद् डा. विश्व पौडेल सदस्य रहेको सिफारिस समिति बनेको छ । समितिले पाण्डे र ढुंगानाको नाम सिफारिस गर्ने जनाइएको छ ।

सत्तारुढ प्रमुख दलका शीर्ष नेताबीच राष्ट्र बैंक भित्रैबाट गभर्नर बनाउने कुरामा सैद्धान्तिक सहमति भएपछि क्षेत्रीको सम्भावना टरेको हो । क्षेत्री विवादित भएकाले पाण्डेलाई गभर्नर बनाउन दुवै शीर्ष नेता सहमत भएपछि पाण्डेले दुवै नेतासँग भेटवार्ता समेत गरेका छन् । प्रधानमन्त्री ओली थाइल्याण्डबाट फर्किंदासम्म परिस्थिति कायमै नरहे पाण्डेको विकल्पमा अन्तिममा निलम ढुंगानाको नाम समेत आउनसक्ने बताइएको छ ।

बैंकका गभर्नर महाप्रसाद अधिकारी चैत २५ गते अवकाशमा जाने भएकाले नयाँ गभर्नरको खोजी भएको हो । चैत २२ गते शुक्रबार राष्ट्र बैंकले उनको बिदाइ गर्दैछ ।