काठमाडौं– टीकापुर घटनाका अभियुक्त निलम्बित सांसद रेशम चौधरी थुनामै रहने भएका छन्।

सर्वोच्च अदालतका न्यायाधीश ईश्वरप्रसाद खतिवडा र पुरुषोत्तम भण्डारीको सोमबारको संयुक्त इजलासले यअघि जिल्ला र उच्च अदालतको आदेशलाई नै सदर गरेपछि उनी थुनामै रहने भएका हुन्।

हालै मात्र सांसदको सपथ ग्रहण गरेका चौधरीले आफूलाई पुर्पक्षका लागि थुनामा राख्ने जिल्ला अदालत कैलालीको आदेश र त्यसलाई सदर गर्ने उच्च अदालत दिपालयको आदेश खारेजको माग गर्दै सर्वाेच्चमा रिट दायर गरेपनि सर्वाेच्चले अस्वीकार गरेको हो।

२ भदौ २०७२ मा टीकापुरमा भएको हिंसात्मक घटनामा नेपाल प्रहरीका एसएसपी लक्ष्मण नेउपानेसहित ८ जनाको ज्यान गएको थियो। घटना लगत्तै चौधरी फरार रहेपनि प्रहरीले उनीविरुद्ध मुद्दा चलाएकोमा गत मंसिरमा भएको निर्वाचनमा कैलाली १ बाट चुनाव लडेका थिए।

फरार रहेकै बेला निर्वाचित भएका चौधरीले जिल्ला अदालत कैलालीमा आत्मसर्मपण गरेकोमा उनी हाल डिल्लीबजार कारागारमा पुर्पक्षका लागि थुनामा छन्।