काठमाण्डु- जारी टी-२० विश्वकप क्रिकेटमा आज राति भारत र साविक विजेता इङ्ग्ल्याण्डबीच दोस्रो सेमीफाइनल खेल हुँदैछ । खेल नेपाली समयअनुसार राति सवा आठ बजे प्रोभिडेन्स स्टेडियम गुयानामा हुनेछ ।

उक्त खेलमा पराजित हुने टोली विश्वकपको उपाधि होडबाट बाहिरिने छ । इङ्ग्ल्याण्डसँगको खेल सुरु हुनुअघि भारतका कप्तान रोहित शर्माले विश्वकपमा भारतले अहिलेसम्म गरेको प्रदर्शन र टोलीको आगामी योजनाबारे खुलासा गरेका छन् ।

पत्रकार सम्मेलनमा विराट कोहलीको प्रदर्शन र अर्शदीप सिंहको बलिङबारे कप्तान रोहितलाई सञ्चारकर्मीले प्रश्न गरे । सञ्चारकर्मीको जवाफमा रोहितले भने, ‘विराटजस्तो खेलाडीले अहिलेसम्म ठूलो रन बनाउन नसक्नु दुर्भाग्यपूर्ण छ, जबकि उनले सधैँ बनाउँदै आएका थिए । जब उनी आउट हुन्छन्, कारण पत्ता लगाउन गाह्रो हुन्छ। ऋषभ पन्त पनि रिभर्स स्वीप खेल्ने क्रममा दुई पटक आउट भएका छन् । टिममा यस्तो टेम्प्लेट छ कि पावरप्लेमा विकेट खस्यो भने अन्य खेलाडीले रन बनाइरहेका छन् कि सेफ्टी फर्स्ट जस्तो कुरा छ ?’

उनले अगाडि भने, ‘हेर्नुस्, यो सबै हाम्रो अगाडि कस्तो अवस्था छ त्यसमा भर पर्छ । कन्डिसनको बारेमा बारम्बार कुरा गर्न मलाई धेरै बोरिङ लाग्छ तर यो महत्त्वपूर्ण कुरा हो किनभने हामीले न्युयोर्कमा जित्ने स्कोर के थियो देख्यौँ, त्यसैले यस्तो अवस्थामा, हामी जान्छौँ र ब्याट घुमाउँछौँ भन्ने सोच्नु यो समझदारीपूर्ण छैन । त्यसैले हामी एक समझदार टोली बन्न चाहन्छौँ, हामी यस्तो टोली बन्न चाहँदैनौँ कि हामी गएर प्रहार गर्न थालौँ। मलाई लाग्छ कि हाम्रो अगाडि के छ र के गर्नुपर्छ भनेर बुझ्नु हाम्रो लागि महत्त्वपूर्ण छ। त्यसबेला मेरो र यो टोलीको अनुभवको बारेमा कुरा गरेको छु । त्यो अनुभवमा निर्भर छ कि उनीहरूले त्यहाँ रिभर्स स्वीप खेल्छन् कि योर्कर बल वा बाउन्सर गर्छन् ।’

शर्माले खेलको बीचमा आफूहरुबीच खेलमा के गर्ने ? भन्नेबारे छलफल नहुने बताए । ‘एक कप्तान र प्रशिक्षकको हैसियतमा, खेल सुरु भएपछि, हामी खेलमा के गर्ने भनेर छलफल गर्दैनौँ । तर, हामी खेलको क्रममा केही पक्षहरूको बारेमा कुरा गर्छौँ । ’, उनले भने ।