काठमाण्डु–भारतको प्रधानमन्त्रीमा तेस्रो पटक निर्वाचित भएपछि प्रधानमन्त्री नरेन्द्र मोदीले विदेश मन्त्रालयमा व्यापक फेरबदलको तयारी गरेका छन् ।

मोदीले आफ्नो तेस्रो कार्यकालको सुरुमै विदेश मन्त्रालयमा हेरफेर गरेर गर्ने संकेत गरेका छन् ।

नयाँ विदेश सचिव र अमेरिकामा रिक्त दुई कुटनीतिक नियोगमा नियुक्ति गर्नु भारतीय जनता पार्टी नेतृत्वको नेशनल डेमोक्रेटिकद एलायन्स (इनडीए)ले आफ्नो विदेश नीतिको पहिलो प्राथमिकता रहने जनाएको छ ।

गत जनवरीमा अमेरिकाका लागि भारतीय राजदूत तरनजित सन्धुले अवकाश पाएपछि सो पद अहिले खाली छ । न्यूयोर्कस्थित संयुक्त राष्ट्रसंघका लागि भारतको स्थायी प्रतिनिधिको पद पनि खाली छ । भारतको नयाँ सरकारले त्यहाँ नयाँ नियुक्ति गर्न लागेको छ ।

भारतीय विदेश मन्त्रालयका सचिव विनय क्वात्रालाई अमेरिकाको राजदूत बनाएर नयाँ सरकारले पठाउन लागेको छ । गत मार्चमा क्वात्राको म्याद ६ महिनाका लागि थपिएको थियो । नेपालका लागि भारतको राजदूत समेत रहिसकेका क्वात्रा नेपालबाट फर्किएपछि सचिव बनेका थिए ।

अहिले उनलाई अमेरिकामा राजदूतको रूपमा पठाउन लागिएको भारतीय सञ्चारमाध्यमले जनाएका छन् ।

मोदी सरकारले भारतको विदेश सचिवमा राष्ट्रिय सुरक्षा परिषद्का उप सल्लाहकार विक्रम मिश्रीलाई नियुक्त गर्दैछ । मिश्री भारतीय विदेश सेवामा १९८९ मा प्रवेश गरेका थिए । उनले नरेन्द्र मोदीसहित तीन जना प्रधानमन्त्रीसँग काम गरिसकेका छन् । सन् २०२२ मा राष्ट्रिय सुरक्षा परिषदमा नियुक्त हुनुअघि उनी चीनका राजदूत थिए ।

प्रधानमन्त्री मोदीको विशेष पहलमा नै उनलाई विदेश सचिव बनाउन लागिएको हो । चीनमा प्राप्त गरेको विशेषज्ञताका आधारमा उनलाई विदेश सचिव बनाउन लागिएको हो ।

न्यूयोर्कस्थित संयुक्त राष्ट्रसंघका लागि भारतको स्थायी प्रतिनिधिमा नविन श्रीवास्तवलाई पठाउने तयारी छ । श्रीवास्तव अहिले नेपालका लागि भारतीय राजदूत हुन् । उनी फिर्ता भएपछि नेपालमा नयाँ राजदूत तोकिने छ ।

मोदीले राष्ट्रिय सुरक्षा परिषद्को उपसल्लाहकारमा फ्रान्सका लागि भारतीय राजदूत जावेद अशरफलाई ल्याउने तयारीमा छन् । उनी मनमोहन सिंह र मोदी दुवैको नेतृत्वमा प्रधानमन्त्रीको कार्यालयमा सहसचिवको रूपमा काम गरिसकेका छन् ।