काठमाण्डु – एक अर्धसैनिक कमान्डर सेनामा भागेपछि आईतबारदेखि अल–जजिरा राज्यमा भएको झडपमा ५० जनाभन्दा बढी मानिसको मृत्यु भएको मध्य सुडानका स्थानीय कार्यकर्ताहरूले बताएका छन् ।
राज्यको राजधानी वाद मदानीमा एक मस्जिदमा भएको सैन्य हवाई आक्रमणमा ३१ जनाको मृत्यु भएको युद्धग्रस्त देशभर सहायता समन्वय गर्ने सयौं स्वयंसेवी समूहमध्ये एक स्थानीय प्रतिरोध समितिले मंगलबार बताएको छ ।
समितिले सेनामाथि ब्यारल बम प्रयोग गरेको आरोप लगाउँदै उद्धारकर्ताहरूले दर्जनौं जलेका र विकृत शरीरहरूको अवशेष खोज्दै गर्दा मृतकहरूमध्ये आधाभन्दा बढीको पहिचान हुन नसकेको बतायो ।
राज्यको युद्धग्रस्त पूर्वी भागमा कार्यकर्ताहरूले आईतबारदेखि अर्धसैनिक आक्रमणमा कम्तीमा २० जनाको मृत्यु भएको बताएका छन् ।
सन् २०२३ अप्रिलदेखि सुडानी सशस्त्र बल र अर्धसैनिक र्यापिड सपोर्ट फोर्स (आरएसएफ) बीच युद्ध चलिरहेको छ । युद्धमा हजारौं मानिसको मृत्यु भएको छ र विश्वकै सबैभन्दा ठूलो विस्थापन र मानवीय संकट सिर्जना भएको छ ।
दुवै सेना हाल मध्य सुडानको कृषि प्रधान अल–जजिरा राज्यमाथि नियन्त्रणका लागि क्रूर युद्धमा छन् । राज्य गत वर्षको अन्त्यदेखि अर्धसैनिक नियन्त्रणमा छ ।
सेनाले आइतबार आरएसएफको अल–जजिरा कमान्डर अबु अक्ला काइकलले अर्धसैनिक बल छोडेर ठूलो संख्यामा आफ्ना सेनाहरू लिएर हाम्रो सेनासँग लड्न आएको घोषणा गरेको छ । यसलाई उनीहरूले सैन्य पक्षमा पहिलो उच्च–प्रोफाइल भगौडाको रूपमा बताएका छन् ।
सेना प्रमुख अब्देल फत्ताह अल–बुरहानका प्रवक्ताले काइकल र अन्य भगौडाहरूले माफी पाउने बताए ।
प्रतिक्रिया