काठमाण्डु-सुदूरपश्चिम प्रदेशका आर्थिक मामिला राज्यमन्त्री प्रकाश बम सवार गाडी भारतमा दुर्घटना भएको छ ।

राज्यमन्त्रीसहित तीन जना सवार प्रदेश ३–०१–०२४ च नम्बरको कार भारतीय नम्बरको कारसँग ठोक्किएको थियो ।

भारतको पलिया बजार नजिक दुर्घटना हुँदा राज्यमन्त्री बम, श्रीमती कल्पना बम र सहयोगी पदम देउवा घाइते भएको कैलाली जिल्ला प्रहरी कार्यालय कैलालीका प्रहरी निरीक्षक दर्शन खड्काले जानकारी दिए ।

राज्यमन्त्री बमको मुख र नाकमा चोट छ, श्रीमती कल्पना बमको छातीमा र सहयोगी पदम देउवाको टाउकोमा चोट रहेको छ ।

उनीहरूको धनगढीस्थित निसर्ग अस्पतालमा उपचार भइरहेको छ । भारतको खिरी जिल्लास्थित पलिया बजारमा उपचारपछि फर्किदा दुर्घटना भएको राज्यमन्त्री बमका भतिजा धनबहादुर बमले जानकारी दिए । उनका अनुसार राज्यमन्त्रीसहित तीनै जनाको अवस्था सामान्य छ ।