काठमाडौं – आईसीसी टीट्वेन्टी विश्वकप क्रिकेटअन्तर्गत एसिया क्षेत्रको अन्तिम चरणको छनोट प्रतियोगिताको पहिलो खेलमा नेपालले हार व्यहोरेको छ । पहिलो खेलमा नै नेपाल कमजोर प्रतिद्वन्द्वी कतारसँग ४ विकेटले पराजित भएको हो ।

नेपालले दिएको १२३ रनको सामान्य लक्ष्य कतारले १९.२ ओभरमा ६ विकेट गुमाएर पुरा गर्यो । कमजोर टोली कतारसँग परजित भएपछि ग्लोबल क्वालिफायरमा छनोट हुँदै विश्ककपको यात्रा तय गर्ने नेपालको बाटो अप्ठेरो बनेको छ।  नेपालका लेग स्पीनर सन्दीप लामिछानेले ४ ओभर बलिङ गर्दा ३३ रन दिएर ३ विकेट लिए पनि त्यसले हार टार्न सकेन । करण केसीले १ विकेट लिए । कतारका लागि इनाम उल हकले ४१, कमरान खानले २२, नौम्यान सरवारले १५, जाहिर इब्राहिमले १२ रनको योगदान दिए ।

यसअघि इन्डियन एसोसिएसन मैदानमा टस जितेर पहिले ब्याटिङ गरेको नेपालले २० ओभरमा सबै विकेट गुमाएर १२२ रन बनाएको थियो ।नेपालले राम्रो सुरुवात गरेपनि त्यसलाई निरन्तरता दिन सकेन । ओपनर पारस खड्का र ज्ञानेन्द्र मल्लले पहिलो विकेटका लागि ४९ रनको साझेदारी गरेका थिए । कप्तान पारस खड्काले १७ बलमा ४ चौका र १ छक्कासहित २८ रन बनाए भने ज्ञानेन्द्र मल्लले १ चौका र १ छक्कासहित २३ रन बनाए ।

त्यसपछि ब्याटिङमा आएका सरद भेषावकर १३ बलमा ७ रन बनाएर आउट भए । चौथो नम्बरमा ब्याटिङमा आएका दिपेन्द्रसिंह ऐरीले सबैभन्दा बढी ३४ रन बनाए । ३५ बलको सामना गरेका उनले १ चौका र १ छक्का हाने । सोमपाल कामीले ११, सन्दिप लामिछानेले ९ रनको योगदान दिए । कतारका लागि इक्बाल हुसेनले ३, नौम्यान सरवार र तमूर सज्जादले समान २–२ विकेट लिए भने इनाम उल–हकले १–० विकेट लिए ।

प्रतियोगितामा सिंगापुर, कतार, नेपाल, मलेसिया र कुवेतको सहभागिता छ।राउन्ड रोबिनको आधारमा हुने प्रतियोगिताको च्याम्पियन टिम विश्व छनोट प्रतियोगितामा पुग्नेछ। नेपालले बुधबार मलेसियासँग खेल्नेछ। विश्व छनोटमा पुग्न नेपालालाई मलेसियाविरुद्धको खेलमा जीत हात पार्नै पर्ने दबाब हुनेछ।