काठमाण्डु – शिक्षा, विज्ञान तथा प्रविधि मन्त्रालयले शिक्षकहरूको तलब मासिक रूपमा उपलब्ध गराउन संघीय मामिला तथा सामान्य प्रशासन मन्त्रालयलाई अनुरोध गरेको छ ।

कतिपय स्थानीय सरकारले शिक्षकलाई मासिक तलब नदिएको गुनासो आएपछि शिक्षा मन्त्रालयले पत्रमार्फत् मासिक भुक्तानीका लागि अनुरोध गरेको हो ।

शिक्षामन्त्री विद्या भट्टराईले शिक्षकलाई मासिक तलब खुवाउन संघीय मन्त्रालयलाई पत्र पठाएर अनुरोध गरेको जानकारी दिँदै भनिन्, ‘शिक्षकले तलब नपाउँदा विद्यार्थीको सिकाइ प्रभावित भएको छ ।’

शिक्षा तथा मानव स्रोत विकास केन्द्रमार्फत ७५३ वटै पालिकामा पत्र पठाएर तलब मासिक रूपमा दिने अनुरोध गरे पनि शिक्षकले तलब नपाएको गुनासो गरेपछि संघीय मामिला तथा सामान्य प्रशासन मन्त्रालयलाई पत्र लेखिएको मन्त्री भट्टराईले जानकारी दिइन् ।

शिक्षा दिवसको अवसर पारेर असोज २ गते सार्वजनिक रूपमा सबै स्थानीय पालिकालाई शिक्षकको तलब मासिक दिन अनुरोध गरे पनि सुनुवाइ नभएको उनको गुनासो छ ।