काठमाण्डु– अमेरिकाको न्यु अर्लिन्सस्थित बोर्बोन स्ट्रिटमा मानिसको भीड पसेको ट्रकले किच्दा १५ जनाको मृत्यु भएको छ ।

अमेरिकी अधिकारीहरूका अनुसार बुधबार भएको सो दुर्घटनामा १५ जनाको मृत्यु भएको छ भने कम्तीमा ३५ जना घाइते भएका छन्।

उक्त घटना अनुसन्धान गरिरहेको अमेरिकी अनुसन्धान एजेन्सी (एफबीआई) ले आरोपित चालकको तस्बिर सार्वजनिक गरेको छ ।

सार्वजनिक तस्बिरका व्यक्ति ४२ वर्षीय पूर्वसैनिक शमसुद्दिन जब्बार हुन्। उनी टेक्सासका बासिन्दा भएको बीबीसीले जनाएको छ।

घटनालगत्तै प्रहरीले हानेको गोली लागेर ट्रक चालक शमसुद्दिनको पनि मृत्यु भइसकेको जनाइएको छ।

एफबीआईले मानिस किच्ने ट्रकमा चरमपन्थी संगठन आईएसको झण्डा भेटिएको बताएको छ। साथै हतियार पनि बरामद भएको छ।