काठमाण्डु- टर्कीको राजधानी इस्तानबुलका मेयर तथा रिपब्लिकन पिपुल्स पार्टी (सीएचपी) का नेता एकराम इमामोग्लुको गिरफ्तारीपछि टर्कीमा अहिले ठूलो राजनीतिक प्रदर्शन भइरहेको छ । जसका कारण त्यहाँ आर्थिक संकट देखिएको छ ।

भ्रष्टाचार र अतिवादी समूहलाई समर्थन गरेको आरोपमा प्रहरीले इमामोग्लुलाई पक्राउ गरेको दाबी गरेको छ । उनको पक्राउपछि हजारौँ मानिस सडकमा उत्रिएका छन् ।

जारी विरोध प्रदर्शनमा प्रहरीसँग ठाउँठाउँमा झडप भएको छ । प्रहरीले रबरको गोली र अश्रुग्यास प्रयोग गरेको अन्तर्राष्ट्रिय सञ्चारमाध्यमले जनाएका छन् ।

टर्कीका राष्ट्रपति रजेप तैयप एर्दोगानले प्रदर्शनको कडा निन्दा गर्दै भनेका छन, ‘हामी सडक आतंक र सार्वजनिक अव्यवस्था स्वीकार गर्दैनौँ ।’

यो घटनाले आर्थिक क्षेत्रमा पनि गम्भीर असर पारेको छ । टर्कीको शेयर बजार दुई दशकयताकै ठूलो संकटमा परेको छ । टर्कीको मुद्रा लिरा ११ प्रतिशतले घटेको छ । यो अवस्थालाई नियन्त्रण गर्न टर्कीको केन्द्रीय बैंकले बजारमा १२ अर्ब डलर खन्याएको छ, तर लिराको मूल्य स्थिर हुन सकेको छैन ।

यो संकटले सन् २०२३ पछि एर्दोगानले सुरु गरेको आर्थिक सुधारलाई ठूलो धक्का दिएको छ । राजनीतिक रूपमा सीएचपी एक धर्मनिरपेक्ष दल हो । मेयर इमामोग्लुलाई सन् २०२८ मा हुने राष्ट्रपति निर्वाचनमा एर्दोगानको सबैभन्दा ठूलो प्रतिद्वन्द्वी मानिन्छ ।

सन् २०२८ को राष्ट्रपति चुनावका लागि उम्मेदवारी घोषणा गरेको केही दिनमै उनलाई पक्राउ गरिएको हो । इस्तानबुल विश्वविद्यालयले उनको स्नातक तहको प्रमाणपत्रलाई अमान्य ठहर गरेको छ, जसका कारण उनले राष्ट्रपति पदका लागि उम्मेदवार बन्ने कानुनी आधार गुमाएका छन् । टर्कीमा राष्ट्रपति पदको उम्मेदवार बन्न स्नातक तहको प्रमाणपत्र अनिवार्य मानिन्छ ।

सीएचपीले आइतबार नयाँ उम्मेदवार चयन गर्न चुनाव गर्दैछ, तर इमामोग्लु नै एकमात्र उम्मेदवार छन् । उनले आफूमाथि राजनीतिक प्रतिशोध साँधिएको आरोप लगाउँदै सबै आरोपको सामना गर्ने स्पष्ट पारेका छन् । उनी कुनै पनि हालतमा एर्दोगानसँग नझुक्ने अडानमा छन् । यस्तो अवस्थामा यो संकटले टर्कीको राजनीति र अर्थतन्त्रलाई थप जटिल बनाएको छ ।