काठमाण्डु-एएफसी यु–१७ एसियन कप छनोटमा नेपाल जितविहीन भएको छ । समूहको अन्तिम खेलमा मंगोलियासँग पराजित भएपछि प्रतियोगितामा नेपाल एक अङ्क पनि जोड्न असफल भएको छ ।

दोहास्थित हमाद बिन खालिफा रंगशालामा भएको खेलमा नेपाल मंगोलियासँग १–० ले पराजित भएको हो । चार टोली सम्मिलित समूहमा तीन खेल हार्दै नेपाल अङ्कविहीन बनेको हो ।

नेपाल यसअघि नै प्रतियोगिताबाट बाहिरिए पनि अन्तिम खेलमा अङ्क जोडेर सान्त्वना जितको खोजिमा थियो । समूह एफमा नेपाल यसअघि साविक विजेता जापानसँग ९–२ तथा घरेलु टोली कतारसँग ५–० ले पराजित भएको थियो ।

छनोट चरणका खेलपछि हरेक समूहको विजेता अर्को वर्ष साउदी अरेबियामा हुने एएफसी यु–१७ एसियन कपका लागि छनोट हुनेछ ।

यस्तै उपविजेता १० टोलीमध्ये उत्कृष्ट ५ उपविजेता टिमले पनि यु–१७ एसियन कपका स्थान बनाउनेछन् । आयोजकको हैसियतमा साउदी अरेबिया स्वतः छनोट भइसकेको छ ।