काठमाण्डु-आइसीसी यु-१९ महिला टि–२० विश्वकप एसिया छनोट अन्तर्गत नेपालले आज चौथो खेल थाइल्याण्डसँग खेल्दैछ ।

नेपाल र थाइल्याण्डको खेल दिउँसो सवा ३ बजे सुरु हुनेछ । युनाइटेड अरब इमिरेट्स (युएई) मा बुधबारदेखि सुरु भएको प्रतियोगितामा तीन खेल खेलिसकेको नेपालले दुई जित र एक हारको सामना गरेको छ ।

नेपालले पहिलो खेलमा थाइल्याण्डलाई ६७ रनले हराएको थियो भने दोस्रो खेलमा कुवेतमाथि १०८ रनले विजयी भएको थियो । शनिबार भएको तेस्रो खेलमा आयोजक युएईसँग नेपाल १३ रनले पराजित भएको छ ।

प्रतियोगितामा आयोजक युएईसहित नेपाल, कुवेत र थाइल्याण्ड सहभागी छन् । प्रत्येक टोलीले एकअर्कासँग दुई दुई खेल खेल्ने छन् । सहभागी चार टोलीमध्ये शीर्ष स्थान हासिल गर्ने टोली आइसीसी यु–१९ महिला टि–२० विश्वकपका लागि छनोट हुनेछ ।

यु-१९ विश्वकप क्रिकेट प्रतियोगिता अर्को वर्ष जनवरीमा मलेसियामा हुँदैछ ।