काठमाडौं–तत्कालीन नेकपा माअाेवादी केन्द्रकाे युवा संगठन योङ कम्युनिष्ट लिग (वाइसिएल) ले नेपाल कम्युनिस्ट पार्टीको समाजवादउन्मुख जनताको जनवादको कार्यदिशालाई अक्षरशः कार्यान्वयन गर्न मातहतका सबै समितिलाई निर्देशन दिएको छ।

एमाले र माओवादी केन्द्रबीच पार्टी एकता भई नेकपा निर्माण भएको सन्दर्भमा मातहतका सबै समितिले पार्टी एकताको भावअनुसार नै गर्न गराउनसमेत आग्रह गरेको छ।

वाइसिएलको शुक्रबारको केन्द्रीय कार्यालयको बैठकले पार्टी एकताको प्रक्रियालाई स्वागत गर्दै मातहतका सबै समितिलाई एकीकृत गर्ने अभियानमा लाग्ने निर्णय गरेको हो ।

बैठकपछि वाइसिएलका अध्यक्ष रामप्रसाद सापकोटा ‘दिपशिखा’ र महासचिव सुबोधराज शेर्पालीले जारी गरेकाे विज्ञप्तिमा भनिएको छ, “पार्टी एकता प्रक्रियालाई सार्थक बनाउन अध्यक्षद्वय केपी शर्मा ओली र पुष्पकमल दाहाल ‘प्रचण्ड’ तथा अन्य नेतृत्वबाट भएको सकारात्मक पहलप्रति धन्यवाद ज्ञापन गर्दछौँ । एकताको भावलाई स्थानीय तहसम्म लैजान र जनतामा सम्प्रेषित गर्न आग्रह गर्दछौँ ।”